Este martes día 12 de novembro tivo lugar na biblioteca do centro unha sesión de lectura moi especial. Continuando coas celebracións do Samaín, que se foron retrasando, finalmente esta tarde fixemos unha actividade sobre os relatos de medo, que xa tiñamos programada, tal como rezaba o noso cartel “Contos de medo”. Decidimos empregar dous textos de Edgar Allan Poe, aproveitando o 170 aniversario do seu pasamento, e deste xeito facerlle unha pequena homenaxe a un dos autores favoritos de moitos lectores do nosos centro. Con intención de sorprender aos rapaces e rapazas puxemos velas e libros do escritor nunha mesa no centro da estancia coas luces apagadas, de xeito que todo parecía o máis fantasmagórico posible. O alumnado de 1º da ESO entraba expectante pola teatralidade do momento, cando de súpeto, mentres estaban acomodándose, víronse interrompidos por un ser que ocultaba o seu rostro baixo unha túnica branca con rachaduras, coma se acabase de saír da procesión da Santa Compaña. Se ven é certo que enseguida souberon que se trataba da profesora de Galego; Pilar, que é a mente detrás destas iniciativas de dinamización.
Tiñamos preparada unha presentación coa que se ía ilustrando a lectura da “Máscara da morte Vermella”, ó tempo que a profesora lía o relato en voz alta, poñéndolle toda a paixón e o misterio que o momento precisaba.
Imaxinades que lles resultou unha sesión entretida, e estades no certo, pero ademis, pretendiamos chamar a atención sobre a importancia do modelo lector. Tradicionalmente os nenos e nenas tiñan ocasión de escoitar contos lidos pola súa contorna, pero mudan os costumes e cada vez teñen menos oportunidades de aprender dun lector adulto.
Deixamos una pequena lembranza desta sesión ó pe da nosa árbore do Samaín na biblioteca.Tamén vos queda a presentación con fotos do evento.